«fazer malefiçio njnguno e si la muger traxiere otra sienpre abras paz e concordia en vno. § Item dize Giluertus que sy beujeres atrjaca mayor con çummo de·la yerba que es dicha ypericon qualquier malefiçio que sea fecho a qualquier persona sera tirado espeçialmente aquellos que son ligados con sus mugeres si fuere enplastrada sobre las rrenes esto es cosa prouada. § Item dize Quirinus que quien traxiere el coraçon e la lengua del buytre sera seguro de todo malefiçio»