«se entiende por aqueste mundo que ha grant fuerça asy como gigante que quiere tirar el vso de·la buena vida al virtuoso luchando con·el por diuersas e muchas tentaçiones que le da. E quando vee que por fuerça vençer non lo puede vsa de engaño mudando·se en otra forma. E toma primero figura de sierpe de muchas pintadas colores trayendo en·la boca venino. Esto faze el mundo mostrando las sus prosperidades e plazeres siquiera»