«verdaderamente bien aventurada, e todas cuytas acabante.§ Por ende de·las semeiantes cosas non te duelas. Mas goza·te mayormente por quanto son çiertas señal para te guiar a·la bienauenturança. e esquiuar aquella tierra tenebrosa, e cubierta de obscuridat de muerte, e venir a·la tierra de·la claridat eternal.§ Ansi como Job ordenadamente concluye de algunos mundanales, e de·la su prosperidat, que gastan en viçios los sus dias»