«toma epitimo calamentun oregano sea todo molido e fecho poluos e toma mjel e cueze·la e espuma·la e amasa o mescla los dichos poluos con la dicha mjel espumada e da este lituario al paçiente antes de·la azeçion cada mañana e sanara de·la quartana. § Item dize Aviçena que el estiercol del omme seco e molido e comjdo con mjel e beujdo con vino non sabiendo·lo el paçiente nueve dias continuos ante de·la açesion sana»