«e a·la noche assi mesmo partio el pan a·los compañeros: e assi vazio todo el canasto. Otro dia como madrugassen el Ysopo yua con·el canasto vazio ante los otros que non lo podian conoscer por el espacio grande del camjno. E mjrando lo los esclauos: non sabiendo que el era Ysopo dizian vnos a otros: e quien es aquel que tanto va adelante: es de nuestra conpañia: o algund peregrino?»