«Canaan adonde auian de morar era toda contaminada por la maliçia de·los que en ella morauan de antes. Tanto que non tan sola mente las casas eran leprosas mas avn la tierra era por sequedat e contagion de·los abitantes tornada salada e jnfecunda. D·esto dixo Dauid en el psalmo çentesimo sexto. Terra fructifera in salsugine a maliçia habitancium in ea. E por esso en aquella ley dize del Levitico en capitulo .xiiii. cum egressi fueritis terram Canaan quam ego dabo vobis in possessione sy fuerit plaga lepre etcetera. E non lo dixo nin mando guardar»