«si en ayunas fuere comjda no·l puede enpesçer comer njn beuer benjnoso. Item dize mas que la rrayz de·la yerba que es dicha çiclamjs enplastrada e puesta sana los muesos venjnosos. § Item dize Ysaque toma rruda e nuezes e mjel e mescla·lo todo enplastrado e pon·lo sobre los de lugares venjnosos e si·lo comjeres destruye todo vmor malenconjco e ponçoñoso e quebranta toda apostema. Item dize mas toma las nuezes con sus cascaras»